कैलाली उद्योग वाणिज्य संघको निर्वाचन अध्यक्षमा दुई जनाकाे दावि

धनगढी । कैलाली उद्योग वाणिज्य संघको नयाँ नेतृत्व चयनको लागी यही भदौ २८ गते निर्बाचन हुदै छ । निर्वाचनको लागि चुनावी माहोल पनि तात्न थालेको छ । अहिले दुई प्यानल सहितको टोली टिम घोषणा गर्ने तरखरमा जुट्न थालेका छन् ।

संघको वर्तमान वरिष्ठ उपाध्यक्ष पुस्करराज ओझा र पूर्व महासचिव रुपेस स्वाँर अध्यक्ष पदका लागि दावेदार रहेको कैलाली उद्योग वाणिज्य संघका महासचिब ओम बिष्ट्ले निशाना न्युजलाई जानकारी दिए ।

यद्यपि, दुवै पक्षले अझै आधिकारिक रूपमा आफ्नो प्यानल घोषणा गरेका छैनन्, तर पुष्करराज ओझाको प्यानल बाट ओम बिष्ट्,दिनेश लम्साल,मनोज अग्रवाल,गगन केसी,सुरेन्द्र कडायत,भिमराज ओझा (अब्बु),वासु भट्ट ,श्याम जोशी र कृष्णाकुमारी विष्टको पदाधिकारीमा लड्ने तयारी रहेको उनले बताए ।

त्यस्तै,रुपेश स्वार प्यानलबाट केशव जोशी,लक्ष्मण पन्त,सिद्धराज पनेरु,सुरेश पाण्डेय, प्रकाश चन्द, अम्बिका भण्डारी र राधिका चौधरीको पदाधिकारीमा लड्ने सम्भावना रहेको उनको भनाइ छ ।

केहि असन्तुष्ट पक्षको तेस्रो प्यानल हुने सम्भावना पनि रहेको उनले बताए ।  मिलन कुँवरलगायत दुई जनाको प्यानल बन्ने चर्चा पनि भइरहेको उनले बताए । टिमको अन्तिम रुप दिन तीव्र छलफल भइरहेको उनले बताए ।

अध्यक्ष पदका उम्मेदवार स्वाँरले सचिवालय सञ्चालन गर्दै सामाजिक सञ्जालमार्फत प्रचार–प्रसार सुरु गरिसकेका छन्। अर्का उम्मेदवार ओझाले भने औपचारिक घोषणा नगरे पनि आफ्ना समर्थकहरूसँग निरन्तर समन्वय गर्दै टिम निर्माणमा सक्रिय रहेको उनले बताए ।
व्यवसायिक क्षेत्रका सरोकारवालाहरूले यो निर्वाचनलाई संघको आगामी नीति तथा गतिविधि निर्धारणमा महत्वपूर्ण मानिरहेका छन्।

संघमा हाल करिब एक हजारभन्दा बढी सदस्य छन् र विगतका निर्वाचनहरूमा पनि दुवै पक्षबीच कडा प्रतिस्पर्धा हुने परम्परा रहँदै आएको छ।

सघंको बैठकले निर्वाचनका लागि सदस्यता नविकरण भदौ १३ गते सम्म राख्ने निर्णय गरेको थियो । निर्वाचनका लागि कैलाली बहुमुखी क्याम्पसका क्याम्पस प्रमुख डा.लोकबहादुर बिष्टको संयोजकत्वमा निर्वाचन समिति गठन गरिएको छ ।

हाल संघको अध्यक्षमा पुष्पराज कुँवर रहेका छन्। २०७९ जेठ २८ गते कुँवर नेतृत्वमा निर्वाचित कार्यसमितिको तीन बर्षे कार्यकाल सकिएपछि निर्वाचन हुन लागेको हो।