आइतबार ०९, मङि्सर २०८१ ०५:१२
काठमाडौं । प्रधानमन्त्री केपी शर्मा ओलीले मंगलबार राष्ट्रका नाममा सम्बोधन गरेका छन् । सरकारी निवास बालुवाटारबाट राष्ट्रका नाममा सम्बोधन गर्दै प्रधानमन्त्री ओलीले कोरोना भाइरसको जोखिम रोक्न सरकारले लिएको कदम, जारी लकडाउनमा नागरिकको साथ, स्वास्थ्य सेवा, परीक्षण र उपचारबारे सम्बोधन गरिरहेका हुन् ।
उनले सिङ्गो विश्वको मानव जगत्मा ७४ हजारभन्दा बढीको कोरोना सङ्क्रमणका कारण मृत्यु भइसकेकामा निधन भएका सबै नेपाली र विश्वका नागरिकप्रति हार्दिक श्रद्धाञ्जलि व्यक्त गर्दै उपचारतहरुको स्वास्थ्यलाभको कामना गरेका छन् ।
ओलीले कोरोना भाइरसको सङ्क्रमण रोकथाम र उपचारमा युद्धस्तरमा काम भइरहेको जनाएका छन् ।
प्रधानमन्त्री ओली सरकार, राजनीतिक दल र सबैको संयुक्त कमाण्डका रुपमा सङ्घीय सरकारले सञ्चालन गरेको कोरोना रोकथाम र नियन्त्रण व्यवस्थापन केन्द्र ९सिसिएमसी० ले युद्धस्तर र समन्वयात्मकरुपमा काम गरिरहेको उल्लेख गरेका हुन् ।
उनले चर्को गर्मीको पर्वाह नगरी स्वास्थ्यकर्मी र सुरक्षाकर्मीहरु निरन्तर खटिरहेकामा उच्च प्रशंसा गर्दै यसमा सबैको सचेततापूर्वक साथ र सहयोगको अपेक्षा व्यक्त गरे ।
उनले नेपालमा साझा प्रयत्नले सङ्क्रमितको सङ्ख्या नौ जना मात्र भए पनि जोखिम कायमै रहेको उल्लेख गर्दै लकडाउनका कारण प्रभावित मजदुर, विद्यार्थी र व्यावसायीलाई सहानुभूति व्यक्त गरेका छन् ।
उनले आउने दुई साता थप कष्टकर हुने भन्दै जहाँ छौं त्यहीं रहौं भनेका छन् ।
ओलीले उपचारमा रहेका स्वास्थ्यकर्मीलाई ड्युटीमा रहेका बेलासरह सम्वोधन गर्ने बताए । उपचारको पहिलो तहमा बस्नेलाई सत्प्रतिशत, दोस्रो तहमा बस्नेलाई ७५ प्रतिशत र तेस्रो तहमा बस्नेलाई ५० प्रतिशत भत्ता उपलब्ध गराउने उनले बताए ।
कोरोनाबाट लड्न विश्वकै विकसित राष्ट्रहरुले तयारी राम्रोसंग गर्न सकेका रहेनछन् भन्ने स्पष्ट भएको भन्दै हाम्रोजस्तो देशमा हम्मेहम्मे पर्नुलाई सामान्य रुपमा लिनुपर्ने बताए ।
उनले नागरिकको जीवनरक्षा भन्दा ठूलो कुरो अरु नभएको पनि प्रधानमन्त्री ओलीले सम्वोधनका क्रममा बताए ।
मिडिया र सामाजिक संजालमा आउने प्रतिक्रियाप्रति गम्भीर ध्यानाकर्षण भएको भन्दै उनले एक जुट हुने बेलामा सरकारका विरुद्ध आएका कुप्रचारले कसैलाई फाइदा नपुग्ने उनले बताए ।
उनले वर्तमान सरकार भ्रष्टाचारीलाई दूरुत्साहित गर्न लागेको पनि दोहोर्याएका छन् ।
ओलीले संचारमाध्यमलाई अझ जिम्मेवार बन्न पनि आग्रह गरेका छन् । उनले सामाजिक दूरी नै कोरोना भाइरस नियन्त्रणको सबैभन्दा उत्तम विकल्प भएको भन्दै त्यही नीतिलाई अवलम्बन गर्न आग्रह गरेका छन् ।
महामारी फैलिन नदिन थप एक साता लकडाउन थपिएको प्रधानमन्त्री ओलीले बताएका छन् । उनले चिकित्सकको आँट र भरोसाबाटै कोरोना जित्न सकिने विश्वास पनि व्यक्त गरेका छन् ।
ओलीले महामारीविरुद्धको लडाइ जित्न भीडमा नजानु नै उत्तम विकल्प भएको बताएका छन् ।
उनले विदेशबाट फर्केका सबैलाई क्वारेन्टाइनमा बस्न पनि आग्रह गरेका छन् ।
यसअघि प्रधानमन्त्री ओलीले सो विषयमा यही चैत ७ गते राष्ट्रका नाममा सम्बोधन गरेका थिए ।
प्रतिकृया दिनुहोस