आम नागरिकको विश्वास जित्ने हाम्रो लक्ष्य छ :एसपी चन्द

धनगढी:  जिल्ला प्रहरी कार्यालय कैलालीका प्रमुख प्रहरी उपरीक्षक (एसपी) नरेन्द्र बहादुर चन्दले प्रहरी संगठनमा आन्तरिक शुद्धीकरणको प्रक्रिया अगाडि बढाउने प्रतिबद्धता व्यक्त गरेका छन्। उनले प्रहरी सेवालाई थप पारदर्शी, जवाफदेही र जनमुखी बनाउनका लागि आन्तरिक सुधारका कदमहरू चालिने बताए।
एसपी चन्दले भने, “हामी प्रहरी संगठनभित्र अनुशासन, इमानदारी र व्यावसायिकता कायम राख्न कटिबद्ध छौं। आन्तरिक शुद्धीकरणमार्फत प्रहरी सेवालाई अझ प्रभावकारी बनाउँदै नागरिकको विश्वास जित्ने हाम्रो लक्ष्य छ।” उनले प्रहरी कर्मचारीहरूको कार्यसम्पादन, आचरण र सेवाप्रवाहमा सुधार ल्याउन विशेष जोड दिइने उल्लेख गरे।
यसका लागि विभिन्न रणनीतिहरू अपनाइने उनले बताए। जसमा प्रहरी कर्मचारीको तालिम, कार्यसम्पादन मूल्यांकन, आन्तरिक अनुगमन र गुनासो सम्बोधन प्रणालीलाई थप सुदृढ गरिने छ। साथै, भ्रष्टाचार, अनियमितता र दुरुपयोगलाई कडाइका साथ नियन्त्रण गरिने उनको भनाइ छ।
कैलाली प्रहरीले विगतमा पनि अपराध नियन्त्रण, मानव बेचबिखन रोकथाम र सामुदायिक सुरक्षामा उल्लेखनीय कार्य गरेको छ। एसपी चन्दको नेतृत्वमा अब प्रहरी सेवालाई अझ चुस्त र विश्वसनीय बनाउन आन्तरिक शुद्धीकरणको यो अभियानले महत्वपूर्ण भूमिका खेल्ने अपेक्षा गरिएको छ।