कैलाली कारागारमा बल्ल प्रवेश गरे सुरक्षाकर्मी

धनगढी – तीन दिनदेखि कैदीबन्दीले नियन्त्रणमा लिएको कैलाली कारागारमा आइतबार बेलुका मात्र हतियारसहितका सुरक्षाकर्मी प्रवेश गरेका छन्। शुक्रबार राति कैदीबन्दीका दुई समूहबीचको झडपका कारण शनिबारदेखि तनावग्रस्त रहेको कारागारमा सुरक्षाकर्मीले प्रवेश गर्न सकेका थिएनन्।

कैदीबन्दीहरूले भित्रबाट ताला लगाउँदै थुनुवा कक्ष पूर्ण रूपमा आफ्नो नियन्त्रणमा लिएर कसैलाई प्रवेश गर्न दिएका थिएनन्। आइतबार बेलुका नेपाल प्रहरी र सशस्त्र प्रहरीको संयुक्त टोली मानव अधिकार प्रदेश कार्यालय, धनगढीको रोहवरमा कारागारभित्र हतियारसहित प्रवेश गरेका हुन्। अब सुरक्षाकर्मीले थुनुवाको अवस्था, संख्यालगायतका बारेमा पनि एकिन गर्ने बताइएको छ।

थुनुवा कक्षको ब्लक ‘ए’ र ब्लक ‘बी’मा रहेका कैदीबीच झडप भएको थियो। झडपमा परी एक कैदीको मृत्यु र ४७ जना घाइते भएका थिए।