शनिबार ०८, मङि्सर २०८१ १०:१४
गाउँपालिकाको मूल ढोकामा राखिएको ‘बाल्टिन बम’ सेनाद्वारा निस्कृय
बझाङ, जेठ ७ । बझाङको छबिस पाथीभेरा गाउँपालिकाको कार्यालयमा राखिएको बाल्टिन बम नेपाली सेना र नेपाल प्रहरीको टोलीले निस्कृय पारेको छ । मंगलबार गाउँपालिकाको मूल ढोकामा अज्ञात समूहले बाल्टिन बम राखेको फेला परेपछि जिल्लाबाट नेपाली सेना र नेपाल प्रहरीको टोली घटनास्थल पुगेर उक्त बम निस्कृय पारेको हो ।
सोमबार राति नै कुनै अज्ञात समूहले गाँउपालिकाको कार्यालयको मूल ढोकामा बम राखेको जिल्ला प्रहरी कार्यालयले जनाएको छ । घटना स्थालमा अटिएका असइ मदन धामीका अनुसार गाउँपालिकाको मूल गेटमा राखेको बाल्टिन बम दिउँसो ३ बजे नेपाली सेना र नेपाल प्रहरीको संयुक्त टोलीले निस्कृय पारेको हो । बाल्टिन बमको वरीपरि सेतो कागजमा पुलिस दमन बन्द गर, भ्रष्ट गाउँपालिकाका अध्यक्ष अक्कल धामी मुर्दाबाद, ६२० भ्रष्टहरु मुर्दावाद लेखिएको कागज फेला परेको प्रहरीले जनाएको छ ।
गाउँपालिकाको बाहिरी सिसि क्यामेरा जडान गरिएको भएपनि उक्त सिसि क्यामेरा समेत च्यातेर फालेको प्रहरीले जनाएको छ । गाउँपालिकाको मुल गेटमा नै बम फेला परेपछि यहाँका कर्मचारी, जनप्रतिनिधिका साथै स्थानीय बासिन्दाहरु समेत त्रसित भएका छन् । उक्त बम अरु कसैले नभएर नेत्रविक्रम चन्द विप्लव समूहले राखेको हुन सक्ने आशंका रहेको जिल्ला प्रहरी कार्यालयका प्रहरी नायब उपरिक्षक सूर्यबहादुर केसीले बताए ।
गाउँपालिकामा विप्लव समूहका कार्यकर्ताहरु चन्दा माग्न गएका र चन्दा नदिएपछि बम राखेको हुन सक्ने प्रहरीको अनुमान छ । अहिले उक्त ठाँउको अवस्था सामान्य रहेको र शान्ति सुरक्षाका लागि प्रहरी परिचालन गरिएको डीएसपी केसीले बताए ।
प्रतिकृया दिनुहोस