पदाधिकारीमा मिश्रित परिणाम नृप सुनारको सर्वाधिक  मत

धनगढी,२० फागुन ।नेपाली काँग्रेस कैलालीको पदाधिकारीमा मिश्रित परिणाम आएको छ । सभापतिमा निर्वाचित नारायणदत्त भट्ट र प्रतिस्पर्धी प्रकाशबहादुर बम दुवै प्यानलबाट पदाधिकारीमा निर्वाचित भएका छन् । उपसभापति, सचिव र सहसचिवको मतगणना शुक्रबार सम्पन्न भएको हो ।
उपसभापतिमा भीम बडुवाल १३२८ र खेम डगौरा थारु ९२३ मत ल्याएर विजयी भएका छन् । बडुवालले भट्ट नेतृत्वको प्यानलबाट र चौधरीले बमको प्यानलबाट उम्मेदवारी दिएका थिए । दुवै जनाले सभापतिमा उम्मेदवारी लड्ने घोषणा गरेका थिए तर टीममा सहमति भएपछि उनीहरु उपसभापतिमा लड्न राजी भएका थिए । 

यस्तै सचिवमा बम प्यानलका नृप सुनार १४९३ मत ल्याएर विजयी भएका छन् । सचिवमै भट्ट प्यानलका केशव मिश्र ११५६ मत ल्याएर विजयी भए । काँग्रेसमा दुई सचिव रहने प्रावधान छ । यस्तै सहसचिवमा कलेशुराम चौधरी ८९६ मत र रामसमझ राना ८८१ मत ल्याउदै विजयी भएका निर्वाचन समितिले जनाएको छ । कार्य समिति सदस्यको मतगणना बाँकी छ ।

बिहीबार भएको मतगणनामा जिल्ला सभापतिमा संस्थापन पक्षका नारायणदत्त भट्ट विजयी भएका थिए । पहिलो चरणमा कुनै पनि उम्मेदवारले ५० प्रतिशतभन्दा बढी मत ल्याउन नसकेपछि दोस्रो चरणमा निर्वाचित भएको थियो । पहिलो चरणमा सबैभन्दा बढी मत ल्याएका बम दोस्रो चरणमा पराजित भए ।

निर्वाचनमा संस्थापनका दुई र संस्थापन इतरको एउटा प्यानलबीच प्रतिस्पर्धा भएको थियो । पदाधिकारीमा संस्थापन इतर समूहबाट पनि विजयी भएनन् । सभापतिमा पहिलो चरणबाट बाहिरिएका शेखर कोइराला पक्षका उम्मेदवार रामबहादुर कलेलको प्यानलले दोस्रो चरणमा बमलाई सघाएको थियो । तर पार्टीको केन्द्रीय नेतृत्व भट्टको पक्षमा खुलेर लागेपछि मतपरिणाम उल्टिएको हो । पार्टी केन्द्रको निर्देशनअनुसार कैलालीबाट प्रतिनिधित्व गर्ने छ जना केन्द्रीय सदस्यलगायत नेताहरु भट्टको पक्षमा उभिएका थिए । निर्वाचनमा संस्थापन पक्षकै दुई खेमाबीच तीव्र धु्रवीकरण देखिएको थियो ।

सुदूरपश्चिमको प्रदेश राजधानी र प्रदेशमै सबैभन्दा बढी निर्वाचन क्षेत्र भएको जिल्ला भएकाले पनि जिल्ला निर्वाचनमा केन्द्रले प्रत्यक्ष हस्तक्षप गरेको बताइएको छ । गत निर्वाचनमा नेतृ आरजु राणा कैलाली क्षेत्र नम्बर ५ बाट पराजित भएकी थिइन् ।

दुवै उम्मेदवार संस्थापन पक्षकै भए पनि निर्वाचनमा केन्द्रले डर, त्रास र प्रलोभन देखाएर भट्टको पक्षमा मतदाता प्रभावित गरिरहेको भन्दै बमको पक्षमा लागेका नेताहरुले सार्वजनिक रुपमै चर्को असन्तुष्टि व्यक्त गरेका थिए । 

आज उपसभापति, सचिव र सहसचिवको मतगणना सम्पन्न भएको निर्वाचन समितिले जनाएको छ। उपसभापतिमा नारायणदत्त भट्ट प्यानलका भीम बडुवाल १३२८ र प्रकाशबहादुर बम प्यानलका खेम डगौरा थारु ९२३ मत ल्याउदै विजयी भएका छन्। चौधरी र बडुवालले यसअघि जिल्ला सभापतिमै चुनाव लड्ने बताउदै आएका थिए भने मनोनयन दर्ताका क्रममा पछि हटेका थिए।

सचिवमा बम प्यानलका नृप सुनारले १४९३ र भट्ट प्यानलका केशव मिश्रले ११५६ मत प्राप्त गर्दै विजयी भएका छन्। बम प्यानलका सुनारले पदाधिकारीहरुमा सर्वाधिक मत ल्याएका हुन् । सभापतिको समेत १ हजार ३ सय ५९ मत आएकोमा सुनारलाई १४९३ मत प्राप्त भएका हुन् ।

यस्तै सहसचिवमा कलेशुराम चौधरी ८९६ र रामसमझ राना ८८१ मत ल्याउदै विजयी भएका छन्। निर्वाचन समितिका अनुसार अब जिल्ला सदस्यको मतगाणना सुरु हुनेछ।

जिल्ला सभापतिमा भने संस्थापन पक्षका नारायणदत्त भट्ट विजयी भइसकेका छन्। उनी दोस्रो चरणको निर्वाचनमा प्रकाशबहादुर बमलाई पराजित गर्दै विजयी भएका हुन्।