बिहिबार ०६, मङि्सर २०८१ १२:२४
पन्ध्र श्ययाको अस्पताल निर्माण हुँदै
पर्वत, १५ फागुन यहाँको एक विकट गाउँमा सुविधा सम्पन्न अस्पताल निर्माण हुने भएको छ । पर्वतको महाशीला गाउँपालिका–५ लुंखुदेउरालीमा १५ श्ययाको अस्पताल बनाइने भएको हो ।
साविक लुङ्खुदेउराली प्राथमिक स्वास्थ्य केन्द्रलाई स्तरोन्नति गरी १५ श्ययाको अस्पताल बनाउन लागिएको स्वास्थ्यचौकी व्यवस्थापन समितिका अध्यक्ष तथा महाशीला गाउँपालिका–५ लुङ्खुदेउरालीका अध्यक्ष जीवनविक्रम उच्चैले जानकारी दिनुभयो । सङ्घीय सरकार स्वास्थ तथा जनसङ्ख्या मन्त्रालयले स्वास्थ्य केन्द्रको स्तरवृद्धि गरी १५ श्ययासहितको अस्पताल बनाउन अनुमति प्रदान गरेपछि निर्माण प्रक्रिया थालिएको हो ।
सङ्घीय र प्रदेश सरकारको ९० प्रतिशत र स्थानीय महाशीला गाउँपालिकालको १० प्रतिशत साझेदारीमा अस्पताल सञ्चालन गर्न लागिएको अध्यक्ष उच्चैले जानकारी दिनुभयो । प्राथमिक स्वास्थ्य केन्द्रको स्तरवृद्धिका लागि राष्ट्रियसभा अध्यक्ष गणेशप्रसाद तिमिल्सिना, भूमि सुधारमन्त्री पद्मा अर्याल, गण्डकी प्रदेशका उद्योग, पर्यटन, वन तथा वातावरणमन्त्री विकास लम्साल र प्रतिनिधिसभा सदस्य पदम गिरीले विशेष पहल गर्नुभएको उच्चैको भनाइ छ ।
गाउँपालिकाका अध्यक्ष राजुप्रसाद पौडेलका अनुसार अस्पतालको नवनिर्मित भवन निर्माणका लागि आवश्यक पर्ने १६ रोपनी जग्गाको व्यवस्थापन भइसकेको छ । पौडेलले भन्नुभयो, “स्वास्थ्यचौकीको नाममा पहिला नै भएको जग्गा र भौतिक संरचनामा केही थप गरेर आवश्यक संरचना निर्माणका लागि जग्गा व्यवस्थापन गरिएको हो । स्थानीय बासिन्दाको सहयोगमा सो जग्गा प्राप्त गरेको उहाँको भनाइ छ ।
अस्पतालको भवन निर्माण गर्न आवश्यक बजेटसमेत यसै वर्ष विनियोजन भइसकेको बताइएको छ । अब तत्काल भवन निर्माणका लागि आवश्यक तयारी गरिने वडाध्यक्ष उच्चैले जानकारी दिनुभयो ।
यस क्षेत्रमा अस्पताल निर्माण भएपछि सानोतिनो स्वास्थ्य समस्याका लागि पनि सदरमुकाम कुश्माबजार, पोखरा, स्याङ्जा जान बाध्य स्थानीयवासी लाभान्वित हुने भएका छन् । यो अस्पतालबाट महाशीला गाउँपालिकाका छ वटै वडा, फलेवास नगरपालिकाको वडा नं १० कुर्घा, पैंयु गाउँपालिकाका भोर्ले र सरौखोला तथा विहादी गाउँपालिकाको बाच्छालगायत स्याङ्जाको अर्जुनचौपारी गाउँपालिकाका बासिन्दा प्रत्यक्षरूपमा लाभान्वित हुने भएका छन् ।
–––
प्रतिकृया दिनुहोस