अनि देउवाले भने– अन्तिमपटक डडेल्धुराबाट चुनाव लड्छु

धनगढी ।जेन–जी आन्दोलनपछि नेपाली कांग्रेसका सभापति शेरबहादुर देउवालाई भेट्न शीर्ष नेताहरूलाई पनि सहज थिएन । झण्डै दुई महिनासम्म त देउवाले राजनीतिक भेटघाट नै बन्द गरे । त्योबीचमा एकपटक कांग्रेसको केन्द्रीय समिति बैठकमा सम्बोधन गरे । अनि, उपसभापति पूर्णबहादुर खड्कालाई कार्यवाहकको जिम्मेवारी सुम्पिए । पछिल्लो दुई सातादेखि भने देउवाले राजनीतिक भेटघाटलाई तीव्रता दिएका छन् । देउवा निवास महाराजगञ्जमा अहिले उनलाई भेट्न जानेको लर्को नै लाग्ने गरेको छ । भेटघाटका क्रममा देउवाले आफू अन्तिमपटक प्रतिनिधिसभा निर्वाचन लड्ने संकेत गर्दै आएका थिए ।

मंगलबार देउवालाई भेट्न पुगेका थिए, नेपाली कांग्रेस डडेल्धुराका सभापति भीमबहादुर साउँद । उनीसँगै थिए, देउवाको गृहपालिका गन्यापधुराका अध्यक्ष इन्द्रबहादुर कार्की, उपाध्यक्ष ज्ञानु सेठी देउवा, परशुराम नगरपालिका मेयर भरत बडायर जोशीलगायतका नेताहरू । ‘डडेल्धुराका जनताले उहाँको सम्मानजनक बिदाई खोजेका छन्,’ सभापति साउँदले भने, ‘डडेल्धुराका जनताकै इच्छाअनुसार सोही कारण भेटघाटका क्रममा हामीहरूले डडेल्धुराबाट प्रतिनिधिसभा निर्वाचन लड्नका लागि उहाँसमक्ष अनुरोध गरेका थियो । जनताको इच्छा भए अन्तिमपटक डडेल्धुराबाट चुनाव लड्छु भन्नुभएको छ ।’

भेटघाटका क्रममा जिल्ला सभापति साउँद, देउवाका गृहपालिकाका अध्यक्ष कार्की र उपाध्यक्ष सेठीले देउवालाई २१ फागुनको निर्वाचन लड्न अनुरोध गरेका थिए । ‘डडेल्धुराका जनताले उहाँलाई ७–७ पटक जिताएका छन्,’ सभापति साउँदले भने, ‘उहाँमाथिको आक्रमण उहाँलाई जिताउने डडेल्धुराका जनतामाथिको आक्रमणका रुपमा हेरिएको छ । त्यसैले एकपटक फेरि जिताएर पठाउनका लागि डडेल्धुराका जनता तयार छन् ।’ जिल्ला सभापति साउँदले आजै काठमाडौंबाट फर्किएर केन्द्रीय निर्देशनअनुसार तोकिएकै मितिमा देउवाको नाम एकल रुपमा सिफारिस गर्ने तयारी रहेको बताए ।

देउवाले डडेल्धुराका युवा नेताहरूसँग पनि भेटघाट बढाएका छन् । ‘हामीहरूसँग पनि उहाँले अन्तिमपटक चुनाव लड्छु भन्नुभएको छ,’ डडेल्धुराकै एक युवा नेताले भने, ‘पार्टी र निर्वाचनमा युवाहरूको सहभागिता पनि बढ्नुपर्छ भन्ने उहाँको धारणा छ ।’

देउवा डडेल्धुराबाट सातपटक संघीय निर्वाचनमा विजयी भइसकेका छन् । २०४८, ०५१, ०५६, ०६४, ०७०, ०७४ र ०७९ सालमा भएको निर्वाचनमा देउवा विजयी भएका थिए । ०६४ सालको निर्वाचनबाहेक अन्य निर्वाचनमा उनले सहज जित निकालेका थिए । ०६४ सालमा भने एक हजार ती सय मतको अन्तरले देउवाले माओवादीका खगराज भट्टलाई पराजित गरेका थिए ।