धनगढीमा चैत ३० गतेदेखि संस्कार क्रिकेट लिग

धनगढी । कैलालीको धनगढीस्थित फाप्ला क्रिकेट मैदानमा चैत ३० गतेदेखि ‘टिम ११ संस्कार क्रिकेट लिग टी–२० सिनियर क्रिकेट प्रतियोगिता’ आयोजना हुने भएको छ । वैशाख ७ गतेसम्म सञ्चालन हुने प्रतियोगितामा जम्मा १३ वटा टिमहरू सहभागी हुनेछन् । 

प्रतियोगिताको आयोजना कैलालीको गोदावरी नगरपालिका–८ अन्तर्गत रहेको संस्कार विद्याश्रम मोन्टेश्वरी स्कुलले गरेको हो भने मुख्य प्रायोजक टिम ११ काठमाडौँबाट समर्थन प्राप्त भएको बताइएको छ ।

प्रतियोगिताको विजेतालाई १ लाख ११ हजार १ सय १ रुपैयाँ, उपविजेतालाई ५५ हजार ५ सय ५५ रुपैयाँ, सर्वोत्कृष्ट खेलाडीलाई ५ हजार ५ सय ५५ रुपैयाँको पुरस्कार प्रदान गरिनेछ । 

साथै, उत्कृष्ट बलर, ब्याटर, र राइजिङ प्लेयरलाई ३ हजार ५ सय ५५ रुपैयाँ र प्लेयर अफ द म्याचलाई १ हजार रुपैयाँ दिने व्यवस्था गरिएको छ।

प्रतियोगिताका संयोजक रामचन्द्र शाहीले प्रतियोगिता सफल बनाउन सबैलाई आग्रह गरे ।  शाहीले धनगढीमा विगत १० वर्षदेखि नियमित रूपमा क्रिकेट प्रतियोगिताहरू सञ्चालन गर्दै आएका छन्। ग्रासरुटबाट क्रिकेटको विकासमा उनी लागि परेका छन् ।